CERPEN BAHASA BALI

PASIH OLAS ASIH

Redite semeng sane galang sangkaning teja sang surya sampun matangi saking ambara, siape pada makruyuk saling sautin pinaka cihna rahina anyar sampun ngawit. Putu Adi kijap-kijap kapupungan kegiat manahipune jagi masekolah nanging wawu pesu saking kamarne saget panggihina adine nonton film kartun sane witnyane saking Malaysia. Lantas adine ngambres mamunyi “Ye Beli nawang tanggal barak jani, anak libur masuk.” Wawu kenten atur adine, digelis Putu Adi malih ka kamar lan masaput bagu. Sawetara sampun jam pitu lebih dasa menit Putu Adi wawu matangi malih lantas mareresik ring kamar wusan punika wawu masiram. Sesampun puput masiram malih adinipune gelis mataken, “Beli lakar kija semengan suba masiram tur sampun mabaju anyar, misi nganggo lengis miik malih!” lantas sautina baan beline, “Niki beli jagi malali ka pasih sareng timpal-timpal di sekolah santukan sampun majanji dugas ipuan”.

Kaceritayang mangkin Putu Adi sampun siaga jagi mamargi nanging sadurung punika ipun mabakti ka marajan nunas karahayuan. Wusan mabakti lantas sampun wenten timpal-timpal ngantos ring arep jeroane, digelis Putu Adi nyapatin raris mamargi sinarengan ka pasih. Ring margine ipun sareng lelima mangonjakan kangin kauh, wenten sane ngorta indik sekolah, indik linuh sane dumun nanging wenten silih sinunggil timpalne mataken indik kahanan pasihe “Wee timpal-timpal sira ngidang nyawab sapunapi kahanan pasihe jani?” lantas masaut Made David “Pasihe jani liu yeh ne!” miragi pasaut buka keto je masuryak timpal-timpal sane lianan sinambi wenten sane ngawewehin “Jani pasihe liu misi be, be gede-gede buin mokoh-mokoh!” keto saut Wayan Bero. Lantas malih masuryak timpal-timpal sane lianan.

Kirang langkung sampun ajam pamargine, Putu Adi sareng sami sampun rauh ring pasih, girang manah ipune sareng lelima manggihin kaluihin pasihe jani. Sesampun tedun saking palinggihan sareng tiga ngenggalang malaib ka sisin pasihe, Luh Ayu sareng Tu Iin ngetut saking ungkur. “Antiang tiang kedik timpal-timpal, batis tiang pacek  ngaad, aduuh sakit”, keto Luh Ayu mapajar sada kantun naanan sakit ring batisipune. Mara miragi munyine Luh Ayu buka keto, lantas sareng tiga gelis ngrereh Luh Ayu. “Kenken batis ngudiang bisa kena sepaku, ten nganggo sepatu to Luh?” keto patakon Yan Bero. “Sepaku? Ngaad to tusing sepaku nanging tiing ane lancip Yan, sajan adane Bero..! Keto Made David nampenin munyine Yan Bero. “Wee….ene malu ubadin batis ane matatu, eda makerah malu ngarang ngaad, benjep garang nyen, jani jemak malu ubad di mobil! Keto Tu Iin mapajar sinami nengkik santukan  sue ngantosang ubad. Malaib Putu Adi ka mobil ngambil ubad raris ngubadin batisne Luh Ayu sane kanin keni ngaad.

“Ngudiang kene pasihe jani, akeh gati misi luu sane ngranayang baya majeng anak sane malali ka pasih”, pakrimik Luh Ayu sinampi ubadina baan timpal-timpalne. “Niki sampun parisolah I manusa sane ulah aluh ngutang luu, ngutang di tlabahe, di tukade, di loloane, bilih-bilih ngentungan langsung ka pasih. Ngawinang pasih sane luih manados daki miwah ngrayanang baya”, Yan Bero maceplos mamunyi keto. “Aiss…tumben Bero beneh munyine tusing stata bero, dija maan ilmu cara keto Yan?, saut David. “Nenten dados David kenten, anak mula beneh pisan ane orahanga sareng Wayan Bero, jani mula parajana sayan rered kesadaran indik kebersihan, sami ngawang ngentungan luu, pamekasne luu sane entungan ka tukad sami mapuara ka pasih, niki sampun kabaos olas asih pasihe nampi sekancan luu sane kutanga ngawag-awag olih manusa sane nenten madue tanggung jawab”, saut  Putu Adi sada banban. “Putut pisan buka keto, sangkaning ulah manusa sane ngawag ngutang luu buka keto, kene suba penadine kahanan pasihe sekadi mangkin, dija-dija akeh madaging luu kaasrian pasih pinaka druen Ida Sang Hyang Baruna manados leteh, minab brangti Ida saking luhur nyuryanin kawentenan sekadi mangkin”. Punika kawewehin malih Tu Iin sinambi nuduk luu sane wenten ring biase genahnyane malinggih.        

Saget sampun tajeg suryane karasayang kulite sampun sayan panes, para yowane sareng lelima punika makinkin jaga ngrereh genah maembon. “Mriki ngrereh genah sane dayuh dumun sampun panes gumine, gelis nyeleman kulit iraga nyen”, keto raos Yan Bero sinambi majalan ka genah dayuh beten punyan nyuh ane rob. Sampun raris kenten mamargi sareng sami ngrereh genah sane dayuh sinambi macanda pada girang. “Timpal-timpal sinambi malinggih lan maembon ngiring ja mareresik kidik driki mangda sayan kedas genah iriki, benjang yening malih malali ka pasih driki mangda wenten pauwahan tur sayan resik pasih iragane. Yening sampun resik seneng manahe prasida ngwantu nglestarisang  palemahan pamekasne ngawit saking pasih driki”, sapunika atur Luh Ayu sane marasa gargita santukan batisne sampun seger. Putu Adi sane wawu wusan nginum toya raris ngajakin timpal sane lianan mareresik nuduk luu sane wenten ring pasih punika “Mriki timpal-timpal mareresik jebos nuduk luu sane wenten driki, bersih itu indah dan sehat”. Makasami pada sregep nglaksanayang parikama mareresik ring wewidangan pasih punika. (Van Cahya).